A cikin awanni 24 da suka gabata, hare-haren da Isra’ila ke kai wa Gaza sun yi sanadin shahadar Falasdinawa 86 tare da raunata wasu 287, a cewar Ma’aikatar Lafiya ta Gaza.
Asibitoci a Gaza sun cika makil da gawarwaki da masu raunuka, yayin da ake ci gaba da kai hare-hare daga Isra’ila ba kakkautawa.
Tun daga ranar 18 ga Maris, 2025, adadin shahidai ya kai 1,249 yayin da adadin masu raunuka ya haura 3,022. Daga lokacin da Isra’ila ta fara wannan hari tun ranar 7 ga Oktoba, 2023, zuwa yanzu, adadin shahidai ya kai 50,609, yayin da mutane 115,063 suka jikkata, a cewar Ma’aikatar Lafiya.
Al’amura na ci gaba da tabarbarewa a Gaza, yayin da duniya ke kallon yadda wannan mummunan yanayi ke kara muni.
A yau da safe, dakarun mamaya na Isra’ila (IOF) sun kutsa arewacin gabar Gaza inda suka fafata da mayaƙan gwagwarmayar Falasdinawa.
Rahoton Al Mayadeen ya bayyana cewa tankokin IOF sun kutsa cikin unguwar Al-Shujaiya da ke arewacin Gaza, inda aka samu arangama tsakanin sojojin Isra’ila da mayaƙan Falasdinawa.
Tashar Isra’ila Channel 12 ta ruwaito cewa rundunar 252 ta IOF na gudanar da wannan aiki tare da goyon bayan hare-haren jiragen sama. Jaridar Yediooth Ahronoth ta kuma ce "sojojin Isra’ila suna faɗaɗa yankin tsaro a iyakar Gaza."
Wannan na zuwa ne yayin da Isra’ila ta kashe sama da mutane 100 a Gaza cikin awanni 24, bayan da ta janye daga yarjejeniyar tsagaita wuta da kuma karɓar wani sabon shiri daga Amurka wanda ya yi watsi da yarjejeniyar farko.
Harin Isra’ila Ya Kashe Falasdinawa 112 a Rana Daya
Hare-haren jiragen saman Isra’ila sun kashe aƙalla Falasdinawa 112 tun safiyar Alhamis, inda aka samu shahidan 71 a birnin Gaza, a cewar wakilin Al Mayadeen daga cikin gabar Gaza.
Sojojin Isra’ila sun kai hari kan wata makaranta da ke ba da mafaka ga iyalan da suka rasa matsuguni a unguwar al-Tuffah ta birnin Gaza, inda mutane 31 suka rasa rayukansu ciki har da mata, yara da tsofaffi, yayin da wasu uku ke bace. Dazuka dama sun jikkata a wannan hari.
Gwamnatin Gaza ta bayyana cewa cikin wadanda suka mutu akwai yara 18, mace daya da tsoho daya.
Jiragen saman Isra’ila sun kuma kai munanan hare-hare kan wasu makarantu da dama a birnin Gaza, lamarin da ya kara dagula lamarin jin kai a yankin.
A cewar Ofishin Yada Labarai na Gwamnatin Gaza, harin Isra’ila ya lalata cibiyoyin mafaka da wuraren gudun hijira har guda 229, wanda hakan babban keta dokar kasa da kasa ne.
"Wannan mummunan hari da Isra’ila ke kaiwa yana faruwa ne a tsakiyar wata babbar masifar jin kai da ba a taba ganin irinta ba," in ji ofishin. "Fannin kiwon lafiya na gab da rugujewa sakamakon rushe asibitoci da kuma takunkumin da ake ci gaba da yi, wanda ke hana isar da agajin gaggawa ga masu bukata."